كلمات قصيدة منطقي للشاعر المصري هشام الجخ بتتكلم عن الواقع اللي عايشينه المسلمين النهاردة. هشام بيحكي عن الغيرة والحسد والتشتت اللي وصلنا له، وازاي إن اللي بيحاولوا يهينوا سيدنا النبي محمد (صلى الله عليه وسلم) ما بيدركوش عظمته. قصيدة منطقي بتوضح الحاجة للوحدة والعمل الصالح ونبذ الفرقة عشان نرجع لقيمنا وديننا الحقيقي.
كلمات قصيدة منطقي هشام الجخ
منطقي لما يبقّى يتيم وأمّي ويبقّى سيّد العالمين
منطقي الحُسّاد هتكتر والعدا والكارهين
واللي هيقولك ده شاعر، واللي هيقولك ده ساحر
واللي هيقولك ده كافر، واللي يكتب واللي يرسم
واللي يكدب واللي يشتم منطقي
هي غيرة، زي غيرة الوليد بن المغيرة
مش كان هيسلم بس حاجة في نفسه حكت
كبره خلّى نفسه شكت
أصل داء الكبر ده أكبر خطر
بس يعني الجنة تعمر وحدها
حبّة في الجنة ونعيمها وحبّة في سقر
ومنطقي لما يبقوا المسلمين حالهم كده
تطلع ضوافر للعِدا
ما دمت مش زارع بإيدك غلّتك
والجوع قرص على معدتك فذلّتك
ما دمت متشتت وتايه في الكلام
فين الودان اللي هتسمع كلمتك
ومنين يجيلك وشّ تحمق
ولا تغضب ولا ترفع كلمتك
هما مش قاصدين يهينوا المصطفى بحبّة صور
هما عارفين إن سيدنا النبي سيد البشر
هما قاصدينك وقاصدني وقاصدين كل جيلنا
وطول ما نتشتت وبنتفرق ونداري الحقايق
لسه ياما راح يجيلنا
لو كانوا حضروه كانوا عرفم يرسموه
كانوا هيسموه بعدله وبسماحته وبهدوءه
كانوا شافوا إن الصحابة
بتلحق الماية للي بتنزل من وضوءه
لو كانوا حضروه كانوا عرفوا يرسموه
احنا مرسمناش نبينا في العيون
احنا فهمناهم إن الدين بتاعنا
لا فيه أدب ولا فيه عمل ولا فيه ولا فيه فنون
اتلهينا في احنا كنا واحنا كنا
واحنا كنا واحنا كنا ونمنا في اللي راح يكون
بس احنا فوقنا، احنا فقنا بجد آسفينلك
وراجعينلك شعبك نشيط عامل وصافي وتقي
زيّك يا سيدنا النبي أبو قلب طاهر نقي
أما اللي وكلاهم غيرتهم فده منطقي
كلمات قصيدة انقشي اسمك على الغضروف – هشام الجخ
قصيدة منطقي – هشام الجخ
أداء: هشام الجخ