مصطفى عاطف

كلمات اغنية الحساب مدفوع مكتوبة وكاملة لمطرب الراب المصري شريف عمر والمنشد الديني مصطفى عاطف وهي اغنية راب جديدة، يحكي كلام اغنية الحساب مدفوع عن الغربة وفرحة الانسان وشعوره عندما تأتيه فيزا السفر ولكنه لا يعمل ما يحدث له في الغربة بعيد عن اصحابه وأهله، إليكم أغنية الحساب مدفوع مكتوبة.

كلمات اغنية الحساب مدفوع

El Hesab Madfoa – Mostafa Atef & Sherif Omar

فرحت يوم ما جاتلي الفيزا فرحة في يوم ماتتنسيش
كان حلم جوة قلبي و كان أمل عليه بعيش
طوق النجاة اللي هيبعدني عن حياه
عنوانها خيبة الأمل فيها احلام ماليش

جريت بلغت أهلي بفرحة تشبه الجنون
اخيرا جه الحلم اللي عشانه الصعب يهون
رايح لدنيا من ذهب فيها النجاح مضمون
النجاح مضمون

شوفت جوة عينيهم نظرة مش ناسيها لالنهاردة
نظرة واحدة بدون كلام بس كتير معاني ساردة

نظرة بيحاولو يدارو الحزن فيها بابتسامه
كبر الطفل الصغير و هيجري يحقق كيانه

صبرت نفسي بكلمتين
هما يومين و هيبقوا تمام

ياما اتغرب اصغر منك
لأجل ما يحقق احلام

ليلة السفر قعدنا نتكلم بالساعات
قالولي بص قدامك ماتبصش للي فات

طول ما الإيمان في قلبك هتعدي التحديات
و اوعي في يوم الدنيا تاخدك فجأة تلقي القلب مات

كلامهم سابني في السرير من غير ما انام لثانية
ذكريات كتير قدام عيوني شايفها باينة

سيناريوهات في بالي خيالي بيرسمهالي
يا تري ايه واقف مستنيني الناحية التانية

كل اما اقرب ع المطار قبضة قلبي بتزيد
احساس مازارش قلبي من قريب أو من بعيد

و انا اللي كنت فاكر قلبي ناشف من حديد
اتاريني أضعف من الورق و دة اكتشاف جديد

ياقلب اني قد اتيتك ناصحاً
فاربأ بنفسك ان تقودك محنتي

ان الغريب سقته ايام الاسى
كأس المرارة في سنين الغربة

اول سنين الغربة كلامي فيها مالوهش عازة
قاعد حزين مش قادر تستني الاجازة

ياما حاجات كانت زمان في منتهي اللذاذة
و معدش ليها طعم و مفيش تفسير لهذا

عدت سنة و جابت سنة و بدأت أحس أن انا
من فترة ضحكي ما اتسمع ولا حس قلبي بالهنا

بكذب و اقول آن الأوان احط حد للعنا
لكني عارف ان دة وهم في خيالي و اتبنى

حاجات بسيطة عمر ما عندي ليها كان تمن
صاحبي اللي لأجل نخرج ياما فوق دماغي زن

حتى تليفوني اللي كان مابيبطلش رن
قربت انسي صوته من كتر ما اتركن

و لو داوى الزمان في جرح في قلبي مش هيطيب
سنة عن سنة تقل الحفاوة بيا و الترحيب

في وسط اقرب الناس حاسس بقيت غريب
ما اللي غاب عن العيون عن القلوب بيغيب

ياقلب أَنِّي قُدّ أَتَيتُكَ ناصَحا
فَأَرْبَأ بِنَفَسكِ أَنَّ تَقُودكَ مِحْنَتَيْيَ

أَنَّ الغَرِيب سُقتِهُ أَيّام الأَسَى
كَأُسّ المَرارَة فِي سَنَّينَ الغُرْبَة

بتفرج ع الحياة زي مسرح في جمهور
كله عارف مكانه الا انا ما ليا دور

في الأحداث ماليش تأثير
زي الكومبارس المغمور
خايف يتحرك لحسن يبوظ الراكور

و في ليلة النوم رافض يقرب فيها من عينايا
قررت اجيب ورقة و قلم و حسبت الحسبة ديا

حسبت ايه اللي كان لحب الغربة في قلبي زارع
حسبت راحة البال و نظافة الشوارع

حسبت أني كمان بقيت ناجح و في شغلي بارع
و لأجل الحسبة تكمل كان لازم أضيف المواجع

حسبت أني اتنسيت كله مشي في طريقه
حسبت صاحبي اللي ماكنتش في ظهره وقت ضيقه

و اللي في فرحه كانت الناس بتسأل فين صديقه
و في وسط الحسبة بدأت عيني تزرف بالدموع
حسبت تاني و تالت و لقيت الحساب مدفوع
و لقيت الحساب مدفوع

اغنية الحساب مدفوع

مواضيع ذات صلة