كلمات اغنية كيف كبرت للفنان الأردني جنزير Janzeer، بتوصف مواجهة مؤلمة أمام صورة الطفولة ومحاكمة الزمن اللي سرق البراءة بدري. بتحكي عن عتاب النفس ولوم الفضول اللي استعجل الكبر قبل أوانه وسط صدمات الحياة القاسية. تراك درامي بيقدم اعتذار متأخر للطفل الداخلي عن الخذلان وتغير الملامح.
كلمات اغنية كيف كبرت – جنزير
نفضت غبار السنين عن وجع صورة غافي
وقفت قبال صورتي والدمع بعيني مش كافي
قاعد لحالي بتأَمّل حياتي واللي فيها
بذهني في عواصف مش عارف لمين أحكيها
بقنع حالي إني أنسى فجأة وبنتبه ع صورة
صورة رجعتني سنين شرخة الروح المكسورة
صورتي وأنا صغير والطفل اللي فيها ما بعرفني
قلي كيف كبرت وصرت أنا ملامحك ما بتشبهني
شوف عيونك كيف بريئة وشوف عيوني كيف جريئة
مش متذَكّر أي إشي قُلّي واكشفلي هَسّة الحقيقة
صدمات الدنيا كانت أكبر مِنّي وفيه كبرت
شو ذنب الطفل يشيل شيلة الزلم وينحت
أطفال كثير بتلعب لحد ما تمل وتتعب
بس الطفل اللي بصورة ما بعرف شو يعني يلعب
بحكي معاك جاوبني مالك ساكت ليه بترُدّش
حاسس إني مجنون بحكي مع صورة وبترُدّش
شو اللي وصلك لهون ليش اخترت اتكون أنا
مع إنه ملامحك حلوة وعيونك كلها رضا
يا طفل اللي بالصورة
خذلتك والزمن غَدّار سرقنا العمر بدري
رمانا بوسط النار أنا آسف على أحلامك
على كل شي فينا انهار
صرت أنا غريب عنك صرت أنت بس تذكار
عيونك تحكي بكرة وعيوني شايلة أسرار
يا طفل اللي بالصورة
ملامحنا اختلفت شتى وبنفس الدار أنت ع جدار
يا ريت نعود لحظة ونغَيّر كلشي صار
بدكاش ترُدّ؟ عادي بقولك كلشي
لا تفَكّر إني مجنون مستَنّي من صورة تحكي
بس الألم غلبني وقاعد أتهرب من زمان
اللي لو بيدي بحرقه وما بلِتف كمان
كان نفسك تكبر وتواجه الدنيا كلها بطولك
خَلّيتنا نصارع من بدري والسبب هو فضولك
حياتي كانت بيدك وأنت واحد من الأسباب
خَلّيتنا نكبر فجأة وما حسبنا أي حساب
كنت أشوفك كيف متحمس وفاتح لدنيا صدرك
مش خايف منها كنت اتعاند كأنها آخر هَمّك
كنت مفَكّر لَمّا تكبر راح تشوف الدنيا أحلى
ما كنت بتعرف إنه العمر بذبل زي الشمعة
جيتك أعاتب صورة كانت روحها تسكن فيني
ليش استعجلت الكِبَر وليش ضَيّعت مِنّي سنيني
بس سامحت الطفل الغافي ببروازه
ما رح أقسى عليك زي ما الزمن طردني على بابه
بس الحقيقة بعترف هذا الطفل أنا اللي خذلته
ببَرّر الفشل اللي فشلته بحياتي وعشته
يا ريتني بقدر أمِد إيدي من الصورة وألمسك
وأعتذرلك عن أخطائي اللي كنت فيها بظلمك
يا طفل اللي بالصورة
خذلتك والزمن غَدّار سرقنا العمر بدري
رمانا بوسط النار أنا آسف على أحلامك
على كل شي فينا انهار
صرت أنا غريب عنك صرت أنت بس تذكار
عيونك تحكي بكرة وعيوني شايلة أسرار
يا طفل اللي بالصورة
ملامحنا اختلفت شتى وبنفس الدار أنت ع جدار
يا ريت نعود لحظة ونغَيّر كلشي صار
اغنية كيف كبرت – جنزير
Keef Kebret – Janzeer
كلمات وتوزيع: Janzeer