كلمات مهرجان الدنيا قاسية لعصام صاصا بتعبر عن معاناة شخص بعيد عن أهله وناسه وبيحس بالوحدة والغربة وكأن الدنيا اتشقلبت بيه فجأة. بيحكي في المهرجان عن الحياة الصعبة اللي بيمر بيها، والظروف اللي واجهته، لدرجة إنه بقى مش عارف مصيره ولا حاسس بأمان. بالرغم من الألم، بيقول أن فيه أمل في رحمة ربنا اللي مش هيسيب حد في ضيق.
كلمات مهرجان الدنيا قاسية عصام صاصا
الدُنيا قاسية إتشقلبت بيا في ثواني
فتحت عيني لقيتني فجأة في دُنيا تاني
وحشتني نفسي وأهلي وأخواتي و مكاني
هون يارب الغربة صعبة مموتاني
ربنا علشان عالم بيا
مش هيشمتكم يوم فيا
قادر يا كريم تسمع ليا
وتنجيني
أنا عارف إنك مش هتسبني
وبلاك معناه إن إنت حاببني
دانا طوب الأرض بيحاربني
طالع عيني
آه من الحياة بقى كل دا كان مُستخبي
أنا مش بخير والصدمة هتوقفلي قلبي
غرقان في بحر دموع مفيش ولا حد جنبي
مبقاش خلاص بإيديا غير إني أدعي ربي
مش عارف أنام من تفكيري
ولا حتى بقرب لسريري
مظلوم ولا عارف إيه مصيري
نفسي نسيتها
مصدوم من كتر اللي حصلي
واللي أنا بسمعو وبيوصلي
حد يفهمني يفسرلي
إيه آخرتها
العجل لما يقع بتكتر سكاكينو
وكأنهم كانو بالسلاح مستنينو
الغدارين متحولين لكلاب مالينو
سانين سنانهم ليل نهار ومقطعينو
كلو بينهش مين بيسمي
عايزين ياكلوني وأنا متغمي
شايفيني وأنا بينزف دمي
ومش راحمني
بالحياة لو طالو يدفنوني
من بكرة في تُربة هيرموني
ويجيبو صوان و يعزوني
الله يعيني
فارقني أبويا وسابلي كوم لحم في رقبتي
من يومها أنا إتيتمت و ماعشتيش طفولتي
واخدني بالظاهر ومش عارفين حقيقتي
بسبب عنيكو على النجاح بدفع ضريبتي
أنا قصة الناس بتألفها
دايرة بتتكلم على كيفها
هي الكواليس مين بيشوفها
آه يا حول الله
بيقولو أشهر شاب في مصر
ومُحقق أحلام العصر
عامل ملايين و صاحب قصر
ولعانة معاه
معايا كام معايا رب إسمو الوكيل
فوضت أمري إليه وبحالي صبح كفيل
اللي معاه ربه ماشفش المُستحيل
قادر يذيح الهم والحمل التقيل
كلمات مهرجان من امتى كنا بنتهدد – عصام صاصا
مهرجان الدنيا قاسية – عصام صاصا
كلمات: مصطفى الجن
توزيع: كيمو الديب