اغنية قطر الحياة لعلي مغربي بتتكلم عن مرور السنين بسرعة، وازاي الوقت بيمر من غير ما نحس. بتعبر عن مشاعر الحنين للماضي والألم الناتج عن الفراق. فيها نظرة على الحياة اللي مبتنصفش حد، والأيام اللي مش بتهدى. المشاعر في اغنية علي مغربي قطر الحياة متشابكة بين الفرح والخوف، والبداية والنهاية بتتشابك مع بعضها.
كلمات اغنية قطر الحياة علي مغربي
وآدي السنين عدّت في لمح البصر
قطر الحياة واخد طريق مختصر
كل اللي راهن ع اللقا خسران
كل اللي راهن ع الوداع إنتصر
العمر عدّى يدوب في كام عدّة
ولا أدّى فرصة لحد ولا هدّى
جمّعنا في محطّة وصول واحدة
قضّينا أيامنا في سكّة سفر
واخد في وشّه العمر مش واقف
يدوب لمحت الدنيا ع الواقف
عايشين ما بين مبسوط وبين خايف
بين البداية والنّهاية وتر
لسّه الحياة ملهاش مزاج تنصفك
لسّه الكلام ما فيهوش كلام يوصفك
وذكرياتك كل ليلة تعود
علشان تحاوطك وتكتّفك
لسّه الحنين للماضي بيجرجرك
لسّه المكان الفاضي بيفكّرك
ولا اللّيالي راضية تهدى عليك
ولا الفراق سألك وخيّرك
اغنية قطر الحياة – علي مغربي
Atr El Haya – Ali Magrebi
كلمات: محمود فاروق
ألحان: مدين
توزيع: عمرو الخضري