اغنية شكرا يا ماما دويتو يجمع بين احمد مكي ونهال نبيل هي رسالة مليانة حب وامتنان لكل أم ضحت وتحملت عشان ولادها. الكلمات بتنقل قصة مؤثرة عن التضحيات والمسؤولية اللي بتتحملها الأم، وإزاي الحب اللي بينها وبين أولادها بيبقى الدافع للاستمرار. مع لحن دافئ وصادق، اغنية شكرا يا ماما بتلمس قلوب كل اللي يقدروا دور الأم في حياتهم.
كلمات اغنية شكرا يا ماما لـ احمد مكي
حنان ملوّش حدود أعظم إنسانه في الوجود ماما
مهما هحكي اللّي في قلبي واللّي نفسي أقوله ليكي
مش هيطلع حتّة نقطة في بحر إحساسي ليكي
كان حلمك تبقي سعيدة وزوج حنون عليكي
تبنوا حياة جديدة وولادك حواليكي
ويدوب حقّقتي حلمك جه وهدّ البيت عليكي
فجأة راح سابك وحيدة وساب ولادك حتّي ليكي
سابك محتارة وحزينة والولاد مسكين إيدكي
بقا عندك اختيار بيت جديد وفرصة تانية
أو تعيشي عمرك وحيدة معا ولادك الصّغار
مسؤوليّة صعبة جدّا كنتي قدّ الاختبار
قولتي هختار ولادي ولو هربّيهم في نار
من انهارده دول حياتي ومش هسيبهم مهما صار
واللّي قالك ليه تضحّي واللّي قالك ده انتحار
واللّي قالك بكره تيجي تندبي سؤء الاختيار
الولاد دول كانوا احنا أنا وإخواتي الكبار
قدرتي تعدّي بينا وتربّينا وده انتصار
وجاي أقولك ببتسامة من عندي شكرا يا ماما
يا أمّي دعوة حلوة منك وإيديكي في السّما
يسمع ربّي منك وينوّرلي أنا
في أوقات كتير كانت الظّروف واقفة ضدّك
كنتي بتخبّي علينا وتدخلي تبكي لوحدك
وأمّا يدخل حدّ فينا بتضحكي وتداري دمعك
بس كنت ببقا عارف مرّة بالصّدفة سمعتك
وقتها أنا رحت حالف باللّي خلقتني وبغلاوتك
إنّي ما هتغفل عيوني إلّا لو وفرحت قلبك
ويجي اليوم اللّي تكوني فيه فخورة إنّ أنا ابنك
لمّا بشوفك وانتي قاعده بفضل أراقبك من سكات
والاقي نفسي بقول لنفسي بحبّ فيكي كتير حاجات
لمّا بتحكي يوم ولادتي يوم ما خدتيني في إديكي
رحت حضناني بمحبّة كلّ تعبك راح عليكي
قمتي بصّالي في عنيّا قومتي يومها سألتي نفسك
انت مين وهتبقي إيه ياربّ يطهرلي قلبك
كنت بهرب من إيدكي وياما بتدلّع عليكي
لمّا أحسّ بخوف وغربه بجرّب واستخبّى فيكي
ولو يوم حسّيت تعب جوّه حضنك تحتويني
وبصوت حنون ودافي تدعي الرّحمن يشفيني
ولمّا بنكسر والأمل أو أفشل بيبقي فاني
بتقوليلي قوم وكمّل قوم وحاول مرّه تاني
طول ما فيك الرّوح يا ابني قوم وحقّق الأماني
ثق في ربّك ثق نفسك قوم عشانك قوم عشاني
بسببك انتي بقيت أشطر طبعا دا انتي ستّ قيّمة
كنّ كلّ أمّا أكبر شايفيك انتي إزاي عظيمة
دا أنا مهما كبرت هاجي أوطي ع رجلك وأبوسها
دا انتي أمّي وانتي عمري وكلّ حاجة حلوه حاسسها
من كلّ قلبي شكرا يا ماما
يا أمّي دعوة حلوة منك وإيديكي في السّما
يسمع ربّي منك وينوّرلي أنا
اغنية شكرا يا ماما – احمد مكي
Ahmed Mekky & Nehal Nabil – Shokran Ya Mama
كلمات: أشرف سليمان
ألحان وتوزيع: شادى السعيد
المزيد من أغاني أحمد مكي
كلمات اغنية اغلى من الياقوت – احمد مكي
كلمات اغنية وقفة ناصية زمان – احمد مكي